“بزاف ديال الناس كانو كيقراو مزيان و فاللخر تخرجو و مخدموش اولا خدمو بصالير قليييل. إذن حتا أنا واخا نقرا و نتقاتل و نجيب مزيان أيطرا ليا نفس الشي فالمستقبل 

!!هاد الهضرة صحيحة و ما صحيحاش 

بصح الآلاف كيتخرجو كل عام و بزااااف منهم كيشوميو. و لكن خصنا نوضحو واحد المسألة، الفكرة ديال غادي نتخرج و نخدم بصالير مزيان من اللول مابقاتش، بمعنى أنه شحاال هادي كانو معظم التخصصات كيتخرجو فيهم عدد قليل، وكان الطلب عليهم كثير، و حتى الجودة ديال هاداك لي تخرج كانت هاااربة مقارنة بالسنوات الأخيرة و السنوات الجاية، فكان عادي أنك تسمع وحدة ياله شدات ماستر فاالاقتصاد و شدات بوسط واعر بصالير مزيان، أو مهندس خدم بمليون ولا زوج

 الإشكال هنا، أنه ولاو عندنا بزااف ديال المتخرجين و للأسف الكفاءة ديالهم طايحة بزاف، كاتلقا واحد عندو باك+5 و ماقادرش يدرليك جملة مفيدة بالفرنسية او الانجليزية، و الواعرة أنه أصلا ماضابطش هاداك الضومين لي تخرج فيه، فالشركات ولاو كيفرضو واحد العدد السنوات د الخبرة باش يقبلوك تخدم معاهم، لأنك ببساطة ماعارف والو وعاد خاصك تعلم من خلال سوق الشغل، فَولينا كنسمعو بالقضية ديال السطاجات بزاف و الخدمة والو، الصاليرات هابطين، حيتاش نتا إذا ماقبلتيش بهداك الصالير راه كاين ألفين واحد من غيرك لي أيقبلو بيه، من اللخر الشركات ولاو كيدفعو كبير حيتاش بنادم لي عندو نفس الديبلوم ديالك موجوووود 

إذن شنو الحل؟ 

أول حاجة وأهم حاجة هي أنك تكون ضابط هاداك الضومين لي ختاريتي تقرا، ماتعولش على داكشي لي كايعطيوك، قلب على راسك و علم راسك براسك

 ثانيا، استغل سنوات الدراسة فأنك تبني علاقات، و دير صطاجات ديال بالصح ماشي هير كدوزو ونتا جالس ماكادير والو أولا ماكاتمشيش أصلا و كيفاليديو ليك الصطاج، و هادي الأغلبية كيديروها 

ثالثا، تعلم مهارات فالتواصل، فالاقناع، فالتسويق لراسك، آااييه حتا هي مهارة و ضروري تكون عندك إذا بغيتي تكون ناجح فحياتك. حضر لمناسبات، شارك فمسابقات، بني شخصيتك باش تكون مميز على الناس لي غادي يتنافسو معاك على الخدمة 

رابعا، طور من عقليتك، تهلا فصحتك الجسدية و النفسية، و كون إنسان قوي و راسو قاصح، حيتاش هادا أهم سلاح باش توصل فين بغيتي 

آه  و ماتسناش تاتسالي لقرايا عاد باش تخدم، جرب خدامي لي تقدر ديرهم و نتا كتقرا هادشي كيدير فرق فالطريقة التفكير ديالك و كيعطيك ثقة فراسك 

خلاصة القول، باش نجاوبو على السؤال، لقراية “بالطريقة لي كتعطيهالك المدرسة” هي لي مابقاتش نافعة كيف كانت لأن جودة التعليم و التكوين هبطات و مازال غادي تهبط، و لكن واش نتا متقدرش تخدم من بعد الدراسة و التخرج فهادي فكرة غالطة. دير اللي عليك و كون واعر و غادي يوليو الشركات يعيطو ليك باش تخدم 

إذا وصلتي لهنا تبارك الله عليك، هادا براسو مؤشر بللي غادي تكون متميز وراك قادر دير بزاف ديال الأمور هير ماتكونش عندك رؤية محدودة للأمور بسباب داكشي لي كاتسمع من المحيط ديالك 

!بالتوفيق